هيءَ ڪانگريس 18 سيپٽمبر 1814ع کان جُون 1815ع تائين نئپوليئن جي شڪست کان پوءِ آسٽريا جي گاديءَ واري شهر ويانا ۾ آسٽريائي چانسلر مئٽرنخ جي صدارت هيٺ منعقد ٿي. ان گڏجاڻيءَ ۾ جيڪي فيصلا ڪيا ويا، تن جو مقصد يورپ ۾ هڪ اهڙو نئون بين الاقوامي نظام قائم ڪرڻ هو، جنهن جي نتيجي ۾ فرانس جي قبضي هيٺ آيل ڪيترائي علائقا پروشيا، روس، آسٽريا ۽ هالئنڊ کي ڏنا ويا ۽ ڪجهه علائقن ۾ بادشاهي سرشتو (جنهن سرشتي جو نئپوليئن انهن علائقن ۾ خاتمو آندو هو) ٻيهر قائم ڪيو ويو. آسٽريا جي چانسلر ميٽرنخ ان سلسلي ۾ اهم ڪردار ادا ڪيو. هيءَ ڪانگريس واٽرلو واريءَ جنگ کان اڳ شروع ٿي ۽ ان جي پڄاڻيءَ کانپوءِ هيٺيان اُپاءَ ورتا ويا.
(1)    يورپي سياسي نقشي جي نئين سر جوڙجڪ ٿي.
(2)    سئٽزرلئنڊ کي نئون آئين ڏئي مڪمل آزادي ڏيڻ جو وعدو ڪيو ويو.
(3)    اقليتن جي حقن کي محفوظ بڻايو ويو.
(4)    يورپي دريائن کي آزاد جهاز رانيءَ لاءِ کوليو ويو.
(5)    مُختلف يورپي سامونڊي ٻيٽن جي ورهاست ٿي.
انقلابي تحريڪن کي تباهه ڪرڻ ۽ استحصالي ٽولن کي ٻيهر يورپ مٿان مڙهڻ ۽ انقلاب فرانس کان وٺي يورپ ۾ جيڪا تبديلي شروع ٿي هئي، تنهن کي روڪڻ جي معاملن تي سهمتي اِن ڪانگريس جو اصل ڪارنامو (ڪڌو ڪم) هو. البت ان ڪانگريس جي نتيجي ۾ اڳتي هلي ”قومن جي مجلس“ ۽ ”گڏيل قومن“ جهڙا عالمي ادارا جوڙڻ جي خيالن کي هٿي ملي.